Насловна Вести ГЕМ во Прилеп: Ни се случува транзиција кон варварски капитализам

ГЕМ во Прилеп: Ни се случува транзиција кон варварски капитализам

20121810-gem-prilep-1-300wАктуелните политичко-економски случувања, локалните проблеми на граѓаните и состојбата со граѓанските слободи беа прашањата кои се дебатираа на третата последователна дебата на граѓанската иницијатива „Граѓани за европска Македонија“ (ГЕМ) одржана на 18-ти октомври во Прилеп.

Отворајќи ја дебатата, Роберто Беличанец со многу емоции оцени дека неговото родно место станало пример за тоа како актуелната власт преку ноќ ги префарбува идентитетот и историјата на македонскиот народ, земајќи го како пример префарбувањето на прилепскиот участок, кој како симбол на фашистичка Бугарија насекаде имал иста боја. „И ден денес во Бугарија сите участоци ја имаат задржано поранешната боја, која била симбол на фашизмот, само овде участокот е префарбан. Тоа префарбување е пример за сè она што во моментов ни се случува. Властите ни ја префабуваат и историјата и идентитетот“ заклучи Беличанец, додавајќи дека добар дел од народот е доведен во ситуација да моли по партиски штабови за работно место, и на луѓето мора да им се помогне да се извадат од таквата ситуација.

Неодамнешната неуспешна интерпелација на Владата покажа дека ВМРО и ДУИ се во силна емотивна врска и дека секоја криза била режирана, оцени Бранко Героски, кој се задржа на последниот извештај на Европската Комисија, и новите моменти во решавањето на спорот со името: „Ако меморандумот од Грција се оцени како добар и ако се прифати, тогаш ќе се затвори прашањето за името, бидејќи ќе имаме име со географска одредница, и ако тоа се случи, тогаш се поставува прашањето зошто Груевски чекаше да поминат седум години за да го реши спорот со името.“

20121810-gem-prilep-2За Никола Гелевски, сегашното ВМРО е радикализација на негативната селекција, која постоеше и во 90-тите, но и во поранешниот систем на СФРЈ. За него исто така несфатливо е фаворизирањето на Скопје на сметка на останатиот дел од Македонија. „Се чини дека во овие 20 години не постои Македонија, туку само Скопје. Се фрлаат од 300 до 500 милиони евра за глупости како што е Скопје 2014, додека останатиот дел од државата тоне во беда и сиромаштија, а вина за тоа има и пасивниот пристап на оние кои не живеат во Скопје, бидејќи ниту еднаш не се побуниле против проектот“ оцени Гелевски, додавајќи дека со промената на имињата на улиците, со Скопје 2014, Груевски ни ја менува и историјата и името и идентитетот, односно го прави сè она за што ја обвинува Грција.

На дебатата учестуваше и новинарот Жарко Јорданоски. Правејќи ретроспектива на својата новинарска работа, Јорданоски оцени дека како дел од весникот „Дневник“ неколку пати му успеало преку агитација на весникот да дојде до промена на власта. „Кога сега ќе погледнам дека во 2006 година му помогнавме на Груевски да дојде на власт, она што го гледам е дека сме помогнале да се создаде еден Франкенштајн, кој кај народот ги разгорува најниските страсти, како омразата и национализмот“ заклучи Јордановски, додавајќи дека опозицијата не смее да биде бледа копија на власта туку треба да ги негува демократските вредности и граѓанските слободи.

Главните принципи на демократијата се јавната дебата и политичките дуели, нешто што во Македонија го нема од 2006-та наваму, а секоја власт која ги гази овие демократски вредности е казнета на избори, што сепак можеби не е случај и со Македонија, оцени Мерсел Биљали. „Слободата на говор кај нас се претвори во минута молчење. Постојано се затвораат медиуми, се казнуваат новинари, а згора на сè постојат и измените во законите кои третираат навреда и клевета, кои ќе создадат уште поголем притисок врз слободата на изразување“ истакна Биљали.

Во своето излагање Владимир Милчин оцени дека во моментов во Македонија се случува транзиција која води кон варварски и примитивен капитализам. “Транзицијата не заврши. Сега ни се случува транзиција кон варварски капитализам. Сведоци сме на огромна класна разлика, која во иднина сеèповеќе ќе се зголемува. Поединци се служат со дивјачко крадење и трупање на богатство, туркајќи го мнозинството до питачки стап. За мене предавници се оние кои ги полнат џебовите викајќи држете ги предавниците“ заклучи Милчин додавајќи дека неговиот личен мотив не е да падне ВМРО за да дојде СДСМ на власт, туку Македонија да стане нормална држава.

Атмосферата меѓу гостите, иако беше позитивна сепак не се одвои од разочараноста на прилепчани, кои во своите излагања истакнаа дека се под постојани притисоци од власта, а економската состојба од ден на ден сè повеќе и повеќе се влошува, а како пример ја посочија и неодамнешната инвазија од инспекции при што покрај притисокот некои дуќанџии биле приморани и да ги затворат своите бизниси. Присутните на дебатата апелираа до граѓаните за масовно учество на протестите кои се одржуваат секој вторник навечер во центарот на Прилеп, затоа што никој друг не може да се избори за слобода освен ние самите.



 

Најави