Насловна Вести Кривичнa пријавa против пратениците кои го изгласаа новиот Закон за лустрација

Кривичнa пријавa против пратениците кои го изгласаа новиот Закон за лустрација

VA4_4326На прес-конференцијата одржана на први јули во ГЕМ клубот, Љубомир Данаилов Фрчкоски, Роберто Беличанец, Никола Гелевски, Бранко Ѓероски, Ѓунер Исмаил, Владимир Милчин и Жарко Трајаноски најавија поднесување кривична пријава против пратениците кои гласаа за новиот Закон за лустрација. Според Љубомир Фрчкоски, со донесувањето на новиот Закон за лустрација владејачкото мнозинство го прекрши членот 377 став 3 од Кривичниот закон, односно стори кривично дело Неизвршување на одлука на Уставен суд на РМ.

Зборувајќи за мотивите за поднесување кривична пријава, Фрчкоски истакна дека со донесувањето на закон спротивен на одлуките на Уставниот суд, се врши рушење на балансот помеѓу власта и Уставот, и директно се негира независноста на Уставниот суд. Фрчкоски потенцираше дека носењето закон со ваков преседан создава нелегалност и газење на уставниот поредок на Македонија.

VA4_4364Запрашан за поднесување евентуална претставка до Уставниот суд, извршниот директор на Фондацијата Отворено општество – Македонија (ФООМ), Владимир Милчин, подвлече дека досега двапати реагирале до Уставниот суд, додека за третата измена на Законот, треба да реагира некој друг. Осврнувајќи се на апелот на ФООМ до Претседателот Ѓорѓе Иванов да не го потпишува Законот за лустрација, Милчин заклучи дека Претседателот со потпишувањето испраќа порака до сите да заборават дека се граѓани и да станат послушници на власта. Милчин најави дека дополнително ќе се разгледува можноста за поднесување кривична пријава и против Претседателот Ѓорѓе Иванов, заради потпишување неуставен закон.

Неодамна, пратениците гласаа за усвојување на Законот за лустрација во кој повторно опфатот на лустрацијата се однесува и на периодот по 17 ноември 1991 година, се уредува лустрирање на лица кои се поранешни функционери, членовите на политичките партии, верските заедници, новинарите и невладините организации, одредби за кои Уставниот суд утврди дека се неуставни и истите ги укина. Повторното регулирање на овие одредби, во спротивност со одлуките на Уставниот суд, е грубо кршење на уставниот поредок и непочитување на извршните одлуки на судот, што, впрочем, претставува кривично дело. Слободата и имунитетот кои ги уживаат пратениците да дискутираат, изнесуваат мислење, да даваат формални предлози и да гласаат, не смее да вклучи во себе свесни активности и постапки спротивни на одлуките на Уставниот суд.

Преземете ја Кривичната пријава (.pdf)






 

Најави