Насловна

MUJAL O NAVAKERIPE

Е-пошта Печати PDF
Pohari-pohari, e Makedoniatar kerde resli phuv savate šaj te ovel biamo o fašizmo. Na dena putardo te ovel kerdi kritika e radžake. Ko dikhipe ikalde e parapoliciakere formacie. Vazdinde i ksenofobia, rasizmo thaj bimangipe kori e marginalizirime. Barjarde kulto ko genetikano užo etnikano kustikipe. Dende dži džanipe sarinenge kaj e džuvlja si mašine bianipaskere. Dena nasvalipe konspirativnikane teorienca. Dežurna došale si e mulane Grkoja, i kurdi Europa, o bičačikano Zapad, e “komunjaria”, o “vlahikano lobi”, a akana thaj o Fuere. I themakiri propaganda uli instrumento baši kontrola e masengiri. Čhudinde anatema upral o individualnipe thaj o kritikano gindipe. Čhudena seme baše neve ulavdipa thaj konfliktoja. Patjarde i phuv darasa.

I Makedonia cidela peske taro dilinkerdo voždo savo so vakerda pes bašo “paluno patjavipe e makedoniakoro”. I Makedonia cidela peske e “familiatar” thaj e vmrovikane kamarilatar savi so parvarela i megalomania e voždoskiri thaj e frustracie e themakere te šaj te čoren. Čorena thaj čhivena avrial e phuvatar. Numa, i Makedonia majbut cidela adalendar save so na vakerena thaj khelena sar statistia ano bikrlikano filmi “Prerodba”. Vaker tuke “dizutne” sovena ke kafičia thaj na vakerena. Thaj dikhena sar “i prerodba” ovela kerdi ani “razgradba”. E fašistia si trujal amende, kote si e antifašistoja?

Na vakerena e biznismenoja. Na vakerena baše neve nacionalizacie. Na vakerena baše pazaria e kinezengere autobusenca ke duj etažia. Na vakerena bašo baro čoripe ko “Svedmilk”. Na vakerena baše helokopteria. Na vakerena baši elektrika. Na vakerena baše tenderia. Na vakerena thaj dilikane gindinena kaj e reketarengere trinore nane te aven olenge ko vudara. A ola avena sako dive. Kerena reketo, dena globa thaj kerena konfiskacia.

Na vakerena e intelektualcoja. Na vakerena e profesoroja, sastarne, xramutne, žurlanistia, arhitektoja, artistia, komandantoja thaj vladike. Na vakerena sar e mačhe. Thaj patjana ke tenderia. Isi olen kariere thaj familie. Kooperantia, kolaborantia, kvislingoja. Ko than te čhingaren- vakerena pohari. Vakerena pohari kana kerena kritika, a but pozorale kana falinena i radži e gruevistengiri.

Kana jekh grupa grkojengere bilačhe mangle te na den te ovel kerdi i promocia e grkikane-makedonikane lafzakoskiri, ola jekhe krlesa thaj putarde sine etiketirime sar fašistia, neonacistia thaj vandaloja. E političaroja, intelektualcoja thaj e žurnalistoja prastana sine pumare rodipanca e bilačhe te oven rodime thaj te oven phandle. O amaro “paluno patjavipe” denda ocena kaj ovela sine lafi bašo baro problemo e grkikane demokratiake. Kana grupa makedoniakere bilačhe na dende te ovel ikerdi i tribina e “gemidžiengiri” ani Struga, na sine nikastar adava osudime thaj na sine vakeripe kaj e manuša so na dende te ovel kerdo adava si fašistia, neonacistia thaj vandalia. Nijekh na pučlja kaj si i policia te čhinavel adava bilačho zoralipe. A kana “bizi irada/spontano” i dilinkerdi tolpa phaglja o mudro protesto anglo skopjakoro ploštado, e ocenke kaj sine kerdo fašistikano čino sine kritikuime sar politikane bikorektikane, trapava thaj barjarde.

“Sorosoidia”, “phukavne”,”pokinde”, “pederia”, adava si šukar šunipaske e seirdžienge, numa “fašistoja”- adava si bidendo! Čhudela ani depresia e marutnen thaj kerela kerki i kafa e manušenge save so na vakerena.

Jakhenca šaj te ovel dikhlo, kaj e dujikane standardoja ule legitimnikane kori amende. Adava so ani Grcia pendžarasa sar fašizmo, amende vakerasa ole so si patriotizmo. I Makedonia uli them e bilačhe marutnengiri. E themakere institucie terdile te arakhen e bilačhe marutnen. O Selikano hakojengoro arakhutno si kororo a isi ole jakha, a o Parlamento učharda prahosa e phandle lafia peskere komisiakere baše manušikane hakoja. O MAB/MVR gelo majdur. Te na ovel sine darikane traiko, ka asa sine amenge ko rodipe mujal o organizatoria e protesteskoro save sine došale soske “košipasa, čhingarasa thaj bišukar relaciasa” phagle o putardo niče thaj o mudripe. Ko agor ka ikljol kaj e bilačhe marutne marde e protestanten ano anav e putarde ničeskoro thaj mudripaskoro!

Sarine save so manegna kompromiso ko proceso e anaveskoro ki them, thaj athe amen “e gemidžie”, sarine sine vakerde tari rig e gruevistengiri sar manuša save si pukavne thaj pokinde. Numa dikh čudo, na nakhlo but vaxt thaj o gruevistikano prezidento e themakoro manglja te kerel “godjaver kompromiso” thaj e megafonia e režimeskere na vakerde oleske kaj si pukavno. Angaljasa lele o xarime godjaveripe e Ivanoveskoro. Kerde pumen ko strojo jekhajekh e direktivasa vastxramome taro genseko e VMRO-DPMNE –eskoro bašo adava kaj kamljol o sel te ovel hazri bašo adava so našti te ovel našaldo. Kana masekonca xovavena sine e sele arakhindo o bidošalipe e voždoskoro!

Kobor ka ovel pokime i prerodba “buvljardi thaj upral tamikerdi”? Ka arakhljavdjovel ja na baro manuš te kerel esapi ko akava finansiakoro thaj politikano škodipe? Finansiakoro, politikano thaj moralnikano bankroto e makedoniakoro? Kon ka definirinel o džovapipe e participantengoro thaj koparticipantengoro ano čoripe kamuflirime sar patriotizmo? O “predobeničko” iranutno e čačipaskoro, a palo adava thaj vicepremiero baše europakere pučipa, denda peske ostavka thaj našaldilo. Našlo e džovapipastar baše džieratutne xovavipa thaj bašo debaklo thaj bankroto save so nane te nakhen amen akava anglo evend. Kobor ka ovel bari i lista e našlengiri taro “prerodbeničko” brodo?

Ka ačhol ja na disavo te kerel orkestracia e horeskere gilavipastar bašo mudripe e voždoskoro kaske nane nijekh dži ko pike, sade o Devel thaj o Aleksandar, kana ka ovel tasavdo amaro Titanik thaj amen olesa?

Skopje, 8 juli 2009